Këshillim Psikologjik

Çfarë është këshillimi psikologjik për burrat e dhunshëm?

Shërbimi i këshillimit psikologjik për burra është një program ndërhyrjeje, i cili synon reduktimin deri në ndalimin e plotë të akteve të dhunës, që ndjekësi i këtij programi kryen ndaj partneres apo familjarëve të tij. Nëpërmjet teknikave të ndërhyrjes, synohet parandalimi i sjelljeve të dhunshme dhe zëvendësimi i tyre me sjellje të reja pa dhunë.

Kush përfiton nga këshillimi i dhunuesit?

Keshillimi psikologjik, është i vetmi shërbim, nga i cili përfitojnë në mënyrë të drejtpërdrejtë viktimat dhe dhunuesi. Nëpërmjet këshillimit rriten mundësitë që viktimat e dhunës të mos përjetojnë më dhunë. Gjithashtu këshillimi ndihmon shkaktarët e dhunës të ndërgjegjësohen për veprimet e tyre të dhunshme dhe të marrin përgjegjësitë për pasojat, që ato shkaktojnë tek viktimat, por edhe tek ai vetë.

Ky shërbim i vjen në ndihmë edhe të gjithë sistemit të ndërhyrjes kundër dhunës në familje, duke shtuar një qasje të re në zvogëlimin e fenomenit dhe rritjen e sigurisë për pjestarët e familjeve me histori dhune.

Objektivi kryesor i punës me burrat që kanë kryer akte dhune në familje, është ndalimi i dhunës. Këshillimi psikologjik i burrave synon të ndryshojë zakonet dhe sjelljet e agresive të dhunuesve, duke i zëvendësuar ato me sjellje dhe zakone të reja të çliruara nga dhuna.

Çfarë ndodh gjatë proçesit të këshillimit?

Praktikat e ndërhyrjes bazohen në besimin që dhuna është një sjellje e mësuar dhe burrat që kryejnë akte dhune, e kanë mundësinë dhe aftësinë për të modifikuar dhe ndryshuar sjelljet e tyre te dhunshme.

Gjatë proçesit të këshillimit fokusi vihet mbi temën e dhunës, marrëdhënien që klienti ka me dhunën, besimet, bindjet, traditat, modelet, normat e klientit dhe një peshë të madhe zë diskutimi mbi aktet e dhunës së kryer nga klienti dhe pasojat e kësaj dhune tek viktimat e tij.

Këshillimi tek ZDB është individual. Nje cikël zgjat minimalisht 16 seanca. Seanca zgjat 50-55 minuta dhe çdo klient ndjek 1 seancë në javë.

Cikli i këshillimit përbëhet nga këto faza kryesore:

Hyrja në shërbim. Klienti njihet me ofertën tonë, kushtet, rregullat dhe pritshmëritë nga ky këshillim.
Këshilluesi përpiqet të zbulojë dhe stimulojë arsyet dhe motivimin e klientit për të ndryshuar sjellje.
Këshilluesi njihet me historinë e klientit. Gjatë kësaj faze flitet për mendimet, besimet, ndjesitë, normat, që ndikojnë në emocionet dhe veprimet e tij, etj…
Ri-ndërtimi i historisë së dhunës (aktit të dhunës). Kjo fazë e këshillimit synon përballjen e klientit me veprimet e tij të dhunshme dhe pasojat e tyre.
Kuptimi dhe pranimi i përgjegjësisë për dhunën e ushtruar.
Ngritja dhe zbritja emocionale gjate nje krize
Adaptimi dhe përforcimi i sjelljeve te reja per menaxhimin dhe zgjidhjen e konflikteve, pa përdorur dhune.

Standartet e shërbimit

Fokusi kryesorë i punës tonë është siguria e viktimave dhe fëmijëv të familjeve me histori dhune.
Dhuna dhe sjelljet abuzivë të çdo lloji, kundrejt partnerit, fëmijëve apo familjarëve të tjerë është e papranueshme dhe nuk ka justifikim.
Dhunuesi është 100% përgjegjës për aktet e dhunshme që ai kryen dhe sjelljet abusive janë zgjedhje e tij.
Predispozita dhe zgjedhja e vullnetshme për të ushtruar dhunë kundrejt partnerit janë sjellje të mësuara dhe të ndikuara nga pritshmëri të krijuara mbi baza gjinore.
Këshillimi dhe çdo e dhënë apo informacion që del gjatë proçesit është konfidencial dhe ruhet në privatësi të plotë.
Këshillimi nuk mund të zhvillohet me persona që janë konsumues të alkoolit, substancave, apo vuajnë nga çrregullime të rënda mendore.